ການຄວບຄຸມທາງໄກການນຳສະເໜີ – ຄູ່ມືການນຳໃຊ້ Impress Remote

LibreOffice Impress Remote ແມ່ນແອັບພລິເຄຊັນແບບເປີດເຜີຍລະຫັດ (open-source) ທີ່ມີໃຫ້ສຳລັບລະບົບປະຕິບັດການ Android ແລະ iOS, ເຊິ່ງຊ່ວຍໃຫ້ທ່ານສາມາດຄວບຄຸມການນຳສະເໜີສະໄລ້ LibreOffice Impress ດ້ວຍອຸປະກອນມືຖືໄດ້.

Impress Remote ສະແດງຮູບຕົວຢ່າງສະໄລ້ໃນໜ້າຈໍອຸປະກອນ ພ້ອມກັບບັນທຶກທີ່ກ່ຽວຂ້ອງຢູ່ທາງລຸ່ມ. ປັດນິ້ວມືຂອງທ່ານໃນໜ້າຈໍເພື່ອໄປໜ້າ ຫຼື ຖອຍຫຼັງໃນການນຳສະເໜີ. ທ່ານຍັງສາມາດສະແດງສະໄລ້ແບບຕາຕະລາງເພື່ອຂ້າມໄປຍັງສະໄລ້ທີ່ຕ້ອງການໄດ້ໂດຍກົງ ເພື່ອຄວາມຄ່ອງຕົວໃນການນຳສະເໜີ.

ການເຊື່ອມຕໍ່ລະຫວ່າງຄອມພິວເຕີທີ່ກຳລັງເປີດການນຳສະເໜີ LibreOffice Impress ແລະ ອຸປະກອນມືຖື ແມ່ນເຮັດຜ່ານບລູທູດ ຫຼື ການເຊື່ອມຕໍ່ເຄືອຂ່າຍ.

ຄຸນສົມບັດຂອງ Impress Remote

Impress Remote ແມ່ນແອັບພລິເຄຊັນທີ່ມີປະໂຫຍດຫຼາຍ ເພື່ອໃຫ້ທ່ານຄວບຄຸມການນຳສະເໜີສະໄລ້ໃນໄລຍະຫ່າງຈາກຄອມພິວເຕີ, ເຮັດໃຫ້ທ່ານສາມາດຍ່າງໄປມາໃນຂະນະທີ່ນຳສະເໜີໄດ້. ຄຸນສົມບັດຫຼັກຂອງມັນຄື:

• ຄວບຄຸມການນຳສະເໜີສະໄລ້ ດ້ວຍທ່າທາງນິ້ວມື ແລະ ການແຕະເທິງໜ້າຈໍອຸປະກອນມືຖື.

• ການເຄື່ອນໄຫວວັດຖຸໃນສະໄລ້ ແມ່ນຖືກກະຕຸ້ນດ້ວຍການແຕະເທິງໜ້າຈໍມືຖື.

• ຕົວຢ່າງສະໄລ້: ສາມາດເບິ່ງຕົວຢ່າງສະໄລ້ການນຳສະເໜີໃນອຸປະກອນມືຖືໄດ້ ເມື່ອທັງຄອມພິວເຕີ ແລະ ອຸປະກອນເຊື່ອມຕໍ່ກັນ.

• ບັນທຶກຂອງຜູ້ນຳສະເໜີ: ມີສ່ວນບັນທຶກຂອງຜູ້ນຳສະເໜີໂດຍສະເພາະຢູ່ທາງລຸ່ມຂອງສະໄລ້ໃນອຸປະກອນຂອງທ່ານ ເຊິ່ງບັນທຶກທັງໝົດຂອງສະໄລ້ຈະຖືກສະແດງຢູ່ບ່ອນນັ້ນ.

• ຕົວຈັບເວລາ: ຕັ້ງເວລາທີ່ສະໄລ້ຈະສະແດງສຳລັບການນຳສະເໜີສະໄລ້ອັດຕະໂນມັດ.

• ຕົວຊີ້ສາຍຕາ: ສະແດງ “ຕົວຊີ້ເລເຊີ” ເທິງໜ້າຈໍຄອມພິວເຕີ, ຄວບຄຸມໂດຍຕຳແໜ່ງນິ້ວມືຂອງທ່ານໃນຮູບຕົວຢ່າງສະໄລ້ເທິງອຸປະກອນມືຖື.

ຄວາມຕ້ອງການ:

ຄອມພິວເຕີ:

• GNU/Linux, Windows ຫຼື macOS.

• ບລູທູດ ຫຼື ການເຊື່ອມຕໍ່ເຄືອຂ່າຍ.

• LibreOffice ເວີຊັນ 4.1 ຫຼື ສູງກວ່າ.

ອຸປະກອນມືຖື:

• ໂທລະສັບ ຫຼື ແທັບເລັດ ທີ່ມີ Android 2.3 ຫຼື ສູງກວ່າ ຫຼື iOS, ພ້ອມດ້ວຍບລູທູດ ຫຼື ການເຊື່ອມຕໍ່ເຄືອຂ່າຍ.

• ແອັບພລິເຄຊັນ Impress Remote ຖືກຕິດຕັ້ງໃນອຸປະກອນມືຖື.

ການດາວໂຫຼດ ແລະ ຕິດຕັ້ງ Impress Remote ໃນອຸປະກອນມືຖືຂອງທ່ານ

ດາວໂຫຼດ Impress Remote ຈາກ Google Play Store ຫຼື Apple Store ໂດຍການຄົ້ນຫາ “Impress Remote” ໃນຊ່ອງຄົ້ນຫາ. ໃຫ້ແນ່ໃຈວ່າຜົນການຄົ້ນຫາແມ່ນ Impress Remote ຈາກ The Document Foundation (TDF). ຕິດຕັ້ງ Impress Remote ໃນອຸປະກອນມືຖືຄືກັບແອັບພລິເຄຊັນມືຖືອື່ນໆ.

ການຕັ້ງຄ່າ Impress Remote

ດ້ວຍການເປີດນຳໃຊ້ Impress Remote ໃນອຸປະກອນມືຖື ແລະ ໃນໜ້າຄອມພິວເຕີ, ເຂົ້າໄປທີ່ໜ້າການຕັ້ງຄ່າໂດຍການແຕະທີ່ມຸມຂວາຂອງໜ້າຈໍ. ມີການຕັ້ງຄ່າຕໍ່ໄປນີ້:

• ການເຮັດວຽກຂອງປຸ່ມສຽງ: ໝາຍເພື່ອເປີດນຳໃຊ້ປຸ່ມສຽງຂອງອຸປະກອນເພື່ອໄປໜ້າເມື່ອກົດປຸ່ມເພີ່ມສຽງ ແລະ ຖອຍຫຼັງເມື່ອກົດປຸ່ມຫຼຸດສຽງ.

• ເປີດໜ້າຈໍຄ້າງໄວ້: ໝາຍເພື່ອປ້ອງກັນການປິດໜ້າຈໍອັດຕະໂນມັດ ແລະ ປ້ອງກັນອຸປະກອນຈາກການລັອກອັດຕະໂນມັດໃນຂະນະທີ່ນຳໃຊ້ Impress Remote.

• ໂໝດງຽບ: ຕັ້ງຄ່າອຸປະກອນໃຫ້ຢູ່ໃນໂໝດງຽບເພື່ອຫຼີກເວັ້ນການແຈ້ງເຕືອນສຽງຂອງສາຍເອີ້ນເຂົ້າ ຫຼື ຂໍ້ຄວາມອື່ນໆ. ການຕັ້ງຄ່ານີ້ບໍ່ມີຜົນຕໍ່ໂໝດສັ່ນທີ່ທ່ານອາດຈະໄດ້ຕັ້ງໄວ້ກ່ອນໜ້ານີ້.

ການເຊື່ອມຕໍ່ຄອມພິວເຕີກັບອຸປະກອນມືຖື

ເປີດບລູທູດທັງໃນອຸປະກອນ ແລະ ຄອມພິວເຕີ ແລ້ວຈັບຄູ່ພວກມັນ. ອ້າງອີງເຖິງຄູ່ມືຄຳແນະນຳຂອງອຸປະກອນ ແລະ ລະບົບປະຕິບັດການຄອມພິວເຕີຂອງທ່ານເພື່ອຮູ້ວິທີເປີດບລູທູດ, ຕັ້ງຄ່າຊື່ບລູທູດ ແລະ ຈັບຄູ່ອຸປະກອນ. ເມື່ອການຈັບຄູ່ສຳເລັດແລ້ວ, ອຸປະກອນມືຖືຈະພ້ອມທີ່ຈະຄວບຄຸມການນຳສະເໜີ.

ອີກວິທີໜຶ່ງ, ທ່ານສາມາດເຊື່ອມຕໍ່ຜ່ານເຄືອຂ່າຍ (ລວມທັງ Wi-Fi). ໃນກໍລະນີນີ, ທັງຄອມພິວເຕີ ແລະ ອຸປະກອນຈະຕ້ອງເຊື່ອມຕໍ່ກັບເຄືອຂ່າຍດຽວກັນ.

ການເປີດນຳໃຊ້ການຄວບຄຸມ Impress Remote ໃນ LibreOffice Impress

ເພື່ອເລີ່ມການນຳສະເໜີສະໄລ້ Impress, ທ່ານຕ້ອງອະນຸຍາດໃຫ້ Impress ຖືກຄວບຄຸມໂດຍອຸປະກອນມືຖື. ໃຫ້ປະຕິບັດດັ່ງນີ້:

1. ເປີດ LibreOffice Impress.

2. ເປີດໜ້າຕ່າງ ການຕັ້ງຄ່າການນຳສະເໜີສະໄລ້.

3. ໃນ ການຄວບຄຸມທາງໄກ, ໝາຍທີ່ຫ້ອງໝາຍ ເປີດນຳໃຊ້ການຄວບຄຸມທາງໄກ ແລ້ວຄລິກ ຕົກລົງ. ທ່ານຄວນເຫັນໜ້າຈໍດັ່ງທີ່ສະແດງໃນຮູບຂ້າງລຸ່ມນີ້.

   

4. ປິດ LibreOffice Impress ແລ້ວເລີ່ມໃໝ່.

ການຄວບຄຸມການນຳສະເໜີສະໄລ້:

1. ໃຫ້ແນ່ໃຈວ່າທັງອຸປະກອນ ແລະ ຄອມພິວເຕີໄດ້ຈັບຄູ່ກັນແລ້ວຜ່ານບລູທູດ ຫຼື ການເຊື່ອມຕໍ່ເຄືອຂ່າຍ.

2. ເປີດການນຳສະເໜີທີ່ທ່ານຕ້ອງການສະແດງໃນ LibreOffice Impress.

3. ເປີດແອັບພລິເຄຊັນ Impress Remote ໃນອຸປະກອນມືຖື ແລະ ເລືອກຊື່ບລູທູດຂອງຄອມພິວເຕີ.

4. ເມື່ອທ່ານຄລິກໃສ່ຊື່ຂອງຄອມພິວເຕີ, ມັນຈະໂຫຼດສະໄລ້ການນຳສະເໜີເຂົ້າໃນ Impress Remote ໂດຍອັດຕະໂນມັດ ພ້ອມດ້ວຍສ່ວນບັນທຶກ.

5. ປັດນິ້ວມືຂອງທ່ານໄປທາງຊ້າຍ ຫຼື ຂວາເທິງໜ້າຈໍມືຖືເພື່ອປ່ຽນສະໄລ້. ບັນທຶກສະໄລ້ຈະຢູ່ທາງລຸ່ມຂອງໜ້າຈໍມືຖື.

6. ທ່ານສາມາດຕັ້ງຕົວຈັບເວລາເພື່ອລະບຸເວລາສະແດງຂອງແຕ່ລະສະໄລ້ຈາກແອັບພລິເຄຊັນມືຖືໄດ້.

7. ສະໄລ້ຍັງສາມາດປ່ຽນໄດ້ດ້ວຍປຸ່ມສຽງໃນອຸປະກອນມືຖື. ເພື່ອເປີດນຳໃຊ້, ໃຫ້ເປີດການຕັ້ງຄ່າ ແລະ ເປີດນຳໃຊ້ການເຮັດວຽກຂອງປຸ່ມສຽງໃນ Impress Remote.

ບາງພາບຖ່າຍໜ້າຈໍຂອງ Impress Remote ໃນມືຖື: